martes, septiembre 19, 2006

Güei pesllé el mio coral ya despesllé la mio amirar

Güei nun ye un bon díi, güei toi un puquiñín señaldosu, ya voi facer daqué que nun se si tornaré a facer, a vegaes, de xemes en cuandu ya si'l díi ye afayaízu dame la ventolera ya escribayo.

Güei voi poner unos versos que fice va unos díis nel metro y nun recibu de los 100 montaditos :

Nuechi prieta nes mios coraes,
pal.labres muertes denyuri falaes,
risca l'aire na mio soledá,
risca, risca ensín finar
fasta lo mas fondu del mio coral,
qu'ayeri foi lo qu'amañá sedrá.
Madrí 19/09/2006

lunes, septiembre 18, 2006

Discursu de darréu nel díi d'Asturies

INTERVENCIÓN DE DARRÉU NEL DÍA LA NACIÓN ASTURIANA 2006

Marcos Menéndez
Güei, ye ocho de setiembre ye´l díi nel que los asturianos cellebramos el nuesu díi de la nación. Ye nidio qu´inda nun tamos pa cellebrar ná, tal comu diz el cartelu “YE HORA DE GÜEYAR POR ASTURIES” y pa eso tamos nós, la xente mozo de Darréu y la xente dalgo menos mozo d´Andecha Astur, tamos pa eso y pa puxar pa qu´el pueblu trabayaor asturianu; qu´abondes vegaes llevantóse, nel so tiempu na hestoria, escontra l´españolismu xabaz qu´intentó desaniciar la nuesa concenxa nacional arrebatándomos de les manes la soberanía que comu pueblu mos cuerrespón por drechu; porque esto nun ye hestoria pasá, NON; nós tenemos de siguir na Asturies de güei.

Tos sabemos dafechu, cuáles son les coses que l´estáu español ta faciendo pa desaniciar el nuesu país, entamando polo que ta faciendo cola xente mozo d´Asturies espardiéndola per tol estáu ya finando con la predemocracia constante que sofre´l nuesu pueblu. Agora l´estáu español tien otres xeres coles qu´intenta desfacer la llucha que caltién Asturies escontra la opresión y la tiranía del reinu, que nun ye más qu´el nomáu “asturianismu” y digo que ye una artimaña del estáu español porque ye otra forma de ser español ya güeyar polos intereses de Madrid y siguir dando-y la espalda al nuesu pueblu, a la nuesa nación. Equí n´Asturies nun somos “asturianistes” nin munchu menos, NON y dígolo bien alto ya nidio NON; equí n´Asturies somos asturianos, asturianos que naguamos por llibramos del gran llastre que tenemos enriba´l llombu, que ye la idega d´españa.

Entós si falamos del papel que tien de facer una bona organización político comu ye Andecha y les sos mocedaes nes que milito ye lluchar pola nuesa nación, y non solu comu organización sinón caún de nós, asina comu diz el cartelu, lo que tenemos de facer ye “LLUCHAR POLA TO NACIÓN” que nun ye otra qu´Asturies; entamando por camudar la concexa d´ún mesmu, dexando nidio que somos parte de daqué muncho más grande que nun ta furrulando comu tien de furrular, si entamamos dende ehí llueu vien la llucha por camudar les inxusticies sociales ya nacionales nel to barriu, conceyu y no más cimero, na nuesa patria constituyía pol nuesu pueblu, POL NUESU PUEBLU TRABAYADOR.

Pero bono esto dizse mui fácil, lo difícil ye caltener la llucha díi tres díi ensin esmolecese; asina comu Andecha que con problemes, pues si a lo meyor munchos, pero lleva 16 años falando nidio, falando nidio ya ensin cayer en falses lluches ya falses pallabres comu cayen dalgún partíu políticu virtual rexíu por unes postures autonomistes ya socialmente moderaes que tos conocemos. Lo fácil ye eso, rentabilizar en votos una llucha inesistente; pues la llucha na qu'ellos quieren ponese les medayes nun ye otra que la que desendolcamos tolos díis n´Andecha y en Darréu. Yo ya muncha xente comu yo, camienta qu´estos partíos ensin Andecha Astur, que ye la braera xunidá del nacionalismu d´esquierda, nun esistiríen. Nun esistiríen porque yá aportaríen al so oxetivu cimeru, finar con Asturies ya convertilo n´Albacete. Home too esto, ensin falar del enxendru d´IZQUIERDA UNIDA (Bloque por Asturies) bono, que yo sepa ye eso na más non; el nome… Porque ya tol mundu tien nidio que ye, otru nome d´IZQUIERDA UNIDA p'aprovechase nes elleiciones de les lluches d´otros y bono, dir un poco d´asturianistes.

Güeyái, fai unos díis dando una vuelta per Llangréu ya güeyando los escaparates de les tiendes, llamóme l'antención unos cartelos, yeren del Bloque por Asturies y falaben del díi de la nación asturiana; asina a primera vista esmolecíme… Porque bah… nun ye prestoso ver cartelos perehí del enxendru esti; pero llueu entamé a camentar ya aporté a la conclusión que si esos cartelos tan nes tiendes y a la xente nun-y escandaliza ver que se fala de díi de la nación asturiana nun ye gracies al Bloque por Asturies; ye gracies a nós. Si la xente ta avezá a qu´Asturies llámese como se merez, a qu´Asturies nómese nación ye gracies a tol trabayu desendolcáu dende fai 16 años por Andecha Astur.

Ye por ello que nun debemos cuntabilizar los nuesos llogros en votos, y dexamos llevar por un posibilismu canceríxenu p´Asturies; ye por eso porque camentamos que ye primero creyar un texíu social asturianu, una concenxa nacional nel que te la mocedá; nel que temos nós. Nel qu´el so principal cabezaleru seya´l pueblu; ya non comu n´esta democracia, ente comílles, nós naguamos porque´l propiu pueblu trabayador asturianu créyase qu´esti trabayu nun ye de llocos, que decidir el so destín nun ye cosa d´una clas política aburguesá ya españolizá; sinón que ye´l so deber y el so drechu. Y non comu anguañu que ye dir ca cuatro años a llanzar un papelín a una caxa tresparente ya llueu aplaudir al nueu fartón que rise de nós; yo eso nun lo quiero p´Asturies, yo eso dientro unos años nun lo quiero pa´l mio fíu; lo que quiero ye una braera soberanía p´Asturies; una braera soberanía n´asturies que mos faiga caleyar haza´l nuesu propiu socialismu.

Nel momentu que tos o una bona parte del pueblu asturianu tea nidio esto, entós si yá tamos falando d´otru sen; entós llucharemos por tener fuercia na Xunta Xeneral o onde´l nuesu pueblu tea mester de nós, pero non pa rentabilizar votos, mos aplaudan enriba la cutrona o pa dexar les coses comu tan; NON. Ye pa caleyar díi tres díi p´algamar una soberanía y una democracia que se mos fai imprescindible. Pero lo que nun podemos facer ye saltamos esi pasu, esi pasu intermediu que tratase de facer una concenxa social ya nacional n´Asturies.

Y esto de facer concenxa nun ye dalgo raro o ensin xaciu; ye dalgo que lleva faciendo Andecha dende lloñe y ye dalgo que Darréu ta faciendo; y se ta faciendo con ca manisfestamientu que sofitamos, con ca revista que con gran esfuerciu algamamos sacar, con ca actu, espichona o conciertu que facemos. Tamos mostrándomos a la xente mozo asturiano comu´n referente na llucha social ya nacional; creyando un movimientu xuvenil asturianu, fuerte ya combativu n´Asturies.

Yá pa dir piesllando la mio intervención, pido a esta xente qu´entamó esti díi de la nación asturiana, a tola xente que ta equí con nós, a la xente d´Andecha Astur, a la xuventú de Darréu y tolos asturianos en xeneral; nun finar la llucha… y nunca esmolecese porque per onde dixe, creyando concenxa, vamos por bon camín; por ehí si que güeyamos pola nuesa nación.

¡¡¡ Puxa Asturies roxa y llibre !!!

viernes, septiembre 08, 2006

Díi D'Asturies

Facia ya dalgunos díis que nu escribayaba ni un res nel blog, pero güei díi d'asturies torno al blog, nun porque tenga grandes coses que dicir, sinon por que los davezu l.leeis isti blog sois del mio pais, y güi ye tamién ye'l vuesu díi, asína que güei pruyo que tengais un bon ya aligüeñu díi, ya los que teis n'asturies celebreislo por los que tamos fora trabayando.

Engüeyamonos nos chigres!!!!