Carta d'amor

Fae unos meses, pa ser esautos en enero, hubo un concursu de cartes d'amor nel conceyu de Aller, diba a presentame, escribí una, pero a la fin nun la unvié, faciendo l.limpieza atopela pol ordenador del trabayu, la carta ye la siquiente :

Ayeri ficiéronse diez años, si, diez años dende que m’escaeciste, diez años dende que colaste l.loñe de mio ya nun fui a saber namái de ti dende entóncenes, diez años dende que la mio vida cayó no fondero de la escuridá, na nuechi entenra.

Entovía remembro esos güeyos verdis comu si los tuviera delantre, mirando fixamente a los de mio, aportándome esa forcia que solo tu sabíes dame.

Entovía remembro esi pelu bermeyu, esos rizos xuguetones que al.lumabenme’l díi al esconsoñar, esa sonrisa perfeuta que me facía tremar ca parte del mio cuerpu, entovía remembro ca parte de ti.

Diez años, diez años suañando ca nuechi que dalgún díi tornarás, que la to nidia piel sedrá de mio otra vegada, que les tos peques fadránme de nuéu amuesar una sonrisa nel mio xeitu, que la mio vida colará de lo fondero d’esa escuridá ya de nuéu tornará a rel.lumar.

Del.les vegaes entrúgome si tu tamién t’alcuerdes de min, pero albidro que non … fae ya muncho que debería tener perdío la esperancia, pero equí toi escribiendo estes l.letres ya a sapiencia de que nun les voi a unviar, a sapiencia de que dirán al caxón de les mios alcordances col restu les cartes de les milenta vegaes que m’alcuerdo de ti.

L.legó’l momentu de despidime, pero non pa siempre, solo fasta que que torne a suañar contigo, solo fasta que cualesquier migaya del to recuerdu me faiga naguar, por un segundu, solo un segundu de ver los tos güeyos, goler el to pelu, besar los tos l.labios ... por solo un segundu, solo un segundu.

Madrí 09 Enero de 2007